Erla Rut

Fæðingarsagan

2009-02-02T13:04:00.000-08:00

Já síðast var ég að röfla um biðina eftir barninu en hún reyndist nú styttri en ég átti von á. Cirka fjórum tímum eftir að færslan var skráð var þessi litla prinsessa fædd. Ég hafði nú fundið einhverja samdrætti um kvöldið en það var ég líka búin að vera að finna í nokkurn tíma og var hætt að gera mér vonir um að það væru einhver merki um að styttast færi í fæðingu. Fór bara upp í rúm að sofa um hálf tólf leytið en um tólf leytið fannst mér þessir samdrættir vera orðnir óvenju miklir og fór niður í eldhús að fá mér einn kornflexdisk og fór eitthvað að brasa og ganga frá einhverju dóti. Um hálfeitt fór ég upp og ýtti í Palla og sagðist halda að þetta væri að fara í gang. Hann ætlaði nú ekki alveg að trúa mér og var ekkert að drífa sig á fætur. Ég var víst búin að kalla soldið úlfur úlfur, alltaf að tala um einhverja samdrætti sem urðu svo ekki að neinu. Ég fór bara að klæða mig og klára að taka til í töskuna og svo þegar ég var farin að beygja mig aðeins saman við samdrættina þá trúði maðurinn mér loksins og dreif sig á fætur. Við hringdum í Fanney sem kom með Söndru litlu 3 mánaða með sér. Þær voru komnar um hálf tvö og þá drifum við okkur af stað. Við vorum komin inná herbergi á fæðingadeildinni um 10 mínútur yfir 2 og rúmum hálftíma síðar, eða 02:47 var stúlkan fædd. Þetta gekk eins og í sögu. Palli dreif sig svo heim um hálf sjö til að hleypa Fanney heim að hugsa um hin börnin sín tvö og hleypa manninum sínum í vinnuna. Palli kom svo með börnin að sækja okkur og vorum við komin heim um hádegisleitið.

Þetta hefði nú eiginlega ekki getað gengið betur upp allt saman og litla snúllan bara sefur og sefur og gerir þessar helstu kúnstir sem börn á hennar aldri gera. Fyrstu dagana svaf hún eiginlega aðeins of mikið og örvaði mjólkurframleiðsluna ekki nógu vel. Hún hafði því misst eitthvað aðeins of mörg grömm þegar við fórum í þriggja daga skoðun svo við fengum ekki að fara aftur heim heldur vorum bara lagðar inn og látnar vinna saman í mjólkurframleiðslunni. Framleiðslan fór á fullt þennan dag sem við vorum þarna inni og daman dafnar vel síðan þá. Bætti á sig 300 gr. á einni viku og fer svo aftur á miðvikudaginn í viktun. Spennó að sjá hvað kemur út úr því:)

En jæja nú er ég held ég farin að rövla aðeins of mikið og held að þriggja barna móðirin ætti að fara að sofa núna.

Bestu kveðjur,

knús og kossar,

Erla Rut, tre barns mama :)

og það er beðið

2009-01-18T13:25:00.000-08:00

já það verður að segjast að við erum aðeins farin að bíða eftir blessuðu barninu :) en ég er þó ekki sett fyrr en morgun 19. janúar samkvæmt sónar. Hélt bara að þetta kæmi örlítið fyrr eins og Freyja Sif gerði en vonandi verða þetta ekki tvær vikur fram yfir eins og með Óðinn Braga!! Veit ekki hvert Palli verður farinn þá!! Hann er ekkert skemalagður í vinnunni út af ástandinu og er því bara heima að bíða með mér :) Svo skammar hann mig á hverjum degi fyrir að vera ekki búin að fæða þetta barn en hvað get ég gert?? en þetta er nú allt í góðu gríni og tíminn líður svo sem ágætlega áfram. Svo er líka ælupest í húsinu sem Óðinn Bragi pikkaði upp í leikskólanum fyrir helgina, svo það er ágætt að klára þann pakka af áður en litla krílið mætir :)

En já að öðru leiti erum við bara hress og kát :)

Kveð að sinni

Hej då

kornflex

svoana kveður dóttir mín á leikskólanum. á íslensku segir maður bless bless klukkan sex kornflex. Þetta hlýtur að ríma og hljóma jafnvel á sænsku eða hvað??

Early pearly

Loksins kom jólasnjórinn :)

2009-01-08T00:30:00.000-08:00

Já við vöknuðum með hvítri jörð í morgun. Óðni Braga fannst þetta náttúrulega frekar spennandi og rannsakaði fótsporin og bílsporin í snjónum á leiðinni í leikskólann. Svo stakk hann uppá því á leiðinni hvort við ættum ekki bara að hafa aðfangadag í dag fyrst væri kominn svona mikill snjór allt í einu!! jú einmitt eigum við ekki bara að endurtaka það allt saman!!! :)

Freyja Sif sat í kerrunni og var ekkert sérstaklega hrifin af að fá þessi litlu snjókorn í andlitið en það var mjög nett og létt snjókoma á leiðinni. Hún jafnaði sig nú fljótt á þessu og var alsæl að koma í leikskólann.

Ég fékk mér svo stuttan göngutúr í hverfinu og er svo að spá í að fara í heitt bað eða gera einhverjar æfingar til að koma þessu barni af stað úr bumbunni!!! ;)

Kveðjum að sinni

Erla og bumban

Gleðilegt árið öll sömul

2009-01-05T07:57:00.000-08:00

Gleðilegt árið kæru vinir og vandamenn. Svona þeir sem ennþá nenna að kíkja hérna inn!! eitthvað lítið um blogg upp á síðkastið en nú er nýtt ár með nýjum og fögrum fyrirheitum. Vera duglegri að blogga, taka á í ræktinni, borða hollt og gott, vera góð og þolinmóð við belssuð börnin og allt þetta helsta, sjáum svo til hvað gengur eftir af þessu öllu saman!!!

Jólin hér á bæ voru ljúf og róleg. Spenningurinn stigmagnaðist hérna allan desember og náði náttúrulega hámarki á aðfangadag sem var sumum litlum mönnum langur og erfiður. Þegar svo loksins var ráðist á pakkaflóðið, eftir ljúffenga austfirska hreindýrasteik, var rifið utan af gjöfunum á mettíma svo var bara spennufall. Það er mikið álag að vera lítill ungur maður á þessum tíma árs. Þó nokkuð Legó leyndist í þessum pökkum og fóru jóladagarnir í legósmíði, át og rólegheit.

Yfir áramótin nutum við nærveru þeirra Hörpu, Guðjóns og Úlfs Stefáns. Þá hélt átið áfram, rólegheitin og kósýheitin. Þau voru svo hugulsöm að taka með sér purusteik sem þau svo elduðu á gamlársdag fyrir okkur. Á nýjársdag var eldaður kjúklingur með kalkúnafyllingu. Við vorum ekki nógu séð að vera búin að versla kalkúninn í tæka tíð og ráfuðum svo á milli búða í leit að kalkúni á gamlársdag sem fékkst hvergi ekki einu sinni frosinn. Þá var fyllingunni bara skellt í rassinn á tveimur kjúllum og var ekki síðra þannig enda örlítið fínna og mýkra kjöt. Svo var James Bond settur á skjáinn þegar börnin voru komin í ró. Sem sagt virkilega rólegt og notalegt yfir hátíðirnar:)

Nú er bara verið að undirbúa komu bumbubúans. Bíðum eftir að henda út jólunum sem við ætlum að gera ekki seinna en á morgun þrettándann og taka svo á móti krílinu. Ég er búin að spá komu þess um helgina svo það er eins gott að það standi sig!!! Barnið er allavega skorðað og einstaka samdrættir farnir að gera vart við sig. Svo ég held það sé að verða þónokkuð tilbúið í slaginn. En þetta kemur víst allt í ljós;)

En jæja ætla að fara að sjóða grjóna!!

Knús og kossar

Erla Rut og familj

Aðventugleði

2008-12-14T07:08:00.000-08:00

Já einmitt tíminn líður og jólin nálgast. Við erum nú búin að gera eitt og annað okkur til dundurs. Um síðustu helgi fórum við aftur í Liseberg og mundum þá eftir skautunum. Palli gat leigt sér skauta og tóku þeir feðgar nokkra góða snúninga á svellinu. Freyju fannst ekki alveg jafn gaman að sitja í kerrunni á meðan og horfa bara á. Hún ætlaði sko út á svellið líka. Það er erfitt að vera lítill en halda að maður sé stór og geti allt eins og stóri bróðir. Sjáum til um næstu jól hvort skvísan getur fengið að spreyta sig:)

Í gær var sænskt jólahlaðborð hjá okkur. Þetta voru fjórar fjölskyldur sem hittust og lögðu allir eitthvað til á borðið. Á borðinu var sænsk jólaskinka, kjötbollur, síld og lax, glögg og ýmislegt tilheyrandi. Boðið byrjaði kl 3 og var fram eftir kvöldi. Ótrúlega ljúft og notalegt:)

Í dag svaf fjölskyldan örlítið lengur en venjulega sem var virkilega notalegt. Eftir morgunmatinn klæddum við okkur svo upp í útivistargallann og skelltum okkur í göngutúr um vatnið okkar. Göngutúrinn var tekinn í miklum rólegheitum þar sem Óðinn Bragi hafði með sér myndavélina sína, sem er gamla myndavélin okkar sem hann fékk að eiga þegar við keyptum nýja. Það þurfti að stoppa hér og þar og smella af hinu og þessu. Svo fékk líka Freyja Sif að hreyfa sig soldið og labbaði hlut úr leiðinni og það tók nú sinn tíma og ekki alltaf farið í þá átt sem við hin ætluðum okkur. Þegar hún var svo orðin þreytt á göngunni skreið hún upp í kerruna sína og sofnaði. Mjög svo huggulegur göngutúr í yndislegu veðri. Kallt, stillt, sól og fallegt:)

Þegar heim var komið settust þeir feðgar niður við tölvuna og skelltu myndunum inn á hana og bjuggu svo til myndasíðu fyrir drenginn. Myndirnar voru nú alveg glettilega góðar miðað við aldur og fyrri störf en þær getið þið séð á picasaweb.google.com/odinnbragi Það er linkur á hann hér til hliðar:)

Á morgun er Luciuhátíð í leikskólanum. Svo það er prógramm á morgun. Kl 3 hjá Freyju og 6 hjá Óðni Braga. Deildin hans Óðins Braga er búin að æfa söngva og atriði sem verður gaman að sjá á morgun. Freyju deild er búin að æfa einhverja söngva en ekkert skipulagt atriði þar sem þau stíga nú ekkert sérstaklega í vitið greyin;)

Nóvemberalbúmið er komið og myndasíðuna. Einhverjum myndum úr afmæli prinsessunnar var bætt inní ágústmánuð og kannski einhverjum í sept og okt man það ekki alveg. Þið getið kíkt:)

Ég kveð nú að sinni

hafið það gott og njótið aðventunnar hún er svo skemmtileg:)

Erla Rut

...og viti menn..

2008-12-02T12:19:00.000-08:00

hún lifnaði við!!! Tæknimaðurinn á heimilinu er náttúrulega ótrúlegur. Hann bjargar ekki bara mannslífum heldur vekur hann líka tölvur aftur til lífsins!!! Þetta er ekki langt og flókið ferli. Þú bara blótar helvítinu verulega færð þér svo skrúfjárn í hönd og hefst handa, grúskar aðeins á netinu kannski, blótar pínu meira og ferð svo út í búð að kaupa box utan um harða diskinn til að komast að því hvort það er tölvan eða harði diskurinn sem krassaði. Svo kemstu að því að harði diskurinn er ónýtur svo það eru smá líkur á að tölvan sé enn í lagi. Næsta skref er að panta nýjan harðan disk í elskuna sem barst á ógnarhraða í hús. Þá er að taka aftur fram skrúfjárnin og krossa fingur og vona að allt gangi upp og fari vel. Sem það gerir kannski ekki í fyrstu tilraun en þá er bara að blóta soldið meira og grúska aftur á netinu og láta sér detta eitthvað sniðugt í hug. Svo kannski þiggur maður kaffibolla frá diggum stuðningsaðila, sest svo aftur og strýkur elskunni soldið blíðlega og talar fallega við hana og allt gengur upp. Tölvan hrekkur í gang og allir eru glaðir, tæknimaðurinn kannski sérstaklega en ekki sýður stuðningsaðilinn sem situr nú og stofunni sinni og hlustar á jólalög fær sér söru og mjólk og chillar með fartölvuna í fanginu!!!

Nokkuð vel af sér vikið og fær tæknimaðurinn margfaldar þakkir fyrir frammistöðuna. Ég hefði auðvitað aldrei klórað mig fram úr þessu á þennan hátt en lagði mitt að mörkum með góðum móral og talsverðri hvatningu, smákökubakstri og alveg ágætis eldamennsku!!

Annars er heilsufarið á heimilinu að skána. Freyja fór í leikskólann í dag en hafði þá ekki farið síðan síðasta þriðjudag. Hún var hress og kát með það. Svo var síðasti tíminn í íþróttaskólanum hans Óðins Braga í dag og fengu þá foreldrar að koma og fylgjast með. Tíminn var teypaður og filmaður svo þegar tími gefst til fáið þið að sjá alveg hreint ótrúleg tilþrif;)

en jæja ætla að láta þetta duga í bili

kveð með kurt og bí

og segi æ lov jú

Early Pearly

Fartalvan dó!!!

2008-11-26T11:11:00.000-08:00

Já nú sit ég inn á kontor og rita hér nokkur orð. Ég sem hélt að Eplatölvur væru ódauðlegar en viti menn, skvísan bara gaf upp öndina!!! Ekki skemmtilegt að þurfa að sitja hér í þessu annars ágæta herbergi en stofan, kjallarinn eða eldhúsið er nú huggulegra með sjónvarpið eða eitthvað annað í gangi í leiðinni!!! En við höfum allavega tölvu, (hún er bara ekki færanleg), svo maður ætti nú kannski ekki að vera að kvarta neitt!!!

Annars er allt ágætt í fréttum af okkur fyrir utan heilsufarið á liðinu. Um leið og Óðinn Bragi hristi af sér kvefið þá tókum við hin þrjú við. Palli og Freyja voru bæði lasin heima í dag en Óðinn Bragi fór í leikskólann hinn hressasti enda búinn að taka sitt út. Freyja er með 39 gráður, frekar örg og pirruð á þessu ástandi. Berst um í hósta og með stöðugt rennsli úr nefinu. Ég sjálf átti minn versta dag í gær, mæddist ægilega við að fara á milli hæða með hellur fyrir eyrunum og frekar drusluleg eitthvað en er á batavegi. Mikið hressari í dag svo það er allt á uppleið. Vonum bara að Freyja verði ekki lengi að hrista þetta af sér því heimilisfaðirinn fær langa helgi núna um hlegina, frí föstudag og mánudag, og svo eru bara tvær næturvaktir í næstu viku. Við ætluðum að gera eitthvað kósý og reyna að koma ýmsu í verk, hengja upp jólaljósin, taka jólakortamynd, fara á skauta, út að borða o.fl o.fl. svo vonandi verða allir orðnir hressir fyrir helgi!!!

Jæja jæja nú ætla ég að hætta þessu kvarti og fara að hugga mig í sófanum með þrist og djúpan. Eigum enn byrgðar frá Íslandi síðan um daginn:)

Bestu kveðjur

Erla Rut og lasarusarnir

Er helgin búin??

2008-11-20T04:29:00.000-08:00

Já einmitt, helgin bara búin og næsta að ganga í garð. Ótrúlegt hvað vikan getur flogið frá heimavinnandi húsmóður!!!;)

Um síðustu helgi var ráðist í að mála panelinn á efstu hæðinni og veggina í herbergjum krakkanna. Þá er allur panell í húsinu orðinn hvítur. Við fluttum í kjallarann á meðan og sváfum þar í fjórar nætur. Litlu dýrin sváfu saman á dýnu á gólfinu og fannst það frekar mikið stuð og tók það tímana tvo að sofna. Ég reyndi eins og ég gat að hjálpa til við málningavinnunna en þar sem ég meira svona eins og þeytispjald á milli barnanna og pensilsins verður að segjast eins og er að Palli gerði þetta nú að mestu leyti einn. Á sunnudaginn litum við nú aðeins upp úr málningardollunum og kíktum í Liseberg. Þetta var fyrsta helgi jólaopnunar og komumst við í mikið jólaskap:) Þeir lofa sko snowgaranti og urðum við vör við það, á smá svæði var þessi fíni gervisnjór yfir öllu og ljúfir jólatónar. Þar er líka skautasvell og skíðabrekka. Við ætlum að fara fljótlega aftur og taka skautana með:) mikið stuð og mikil gleði.

Annars höfum við haft það bara gott. Óðinn Bragi var heima fyrstu þrjá daga vikunnar, með astmakvef og soldið slappur karl. Við reyndum nú að gera eitthvað til að stytta okkur stundirnar og bjuggum okkur til trölladeig og föndruðum smá jólaföndur. Á morgun ætlum við svo að baka piparkökurnar svo við eigum nú nóg af þeim þegar aðventan gengur í garð:)

Kíkiði svo endilega á myndirnar okkar. September og október eru loksins komnir inn;)

Bið að heilsa í bili

Knús yfir hafið

Erly pearly

We will rock you!

2008-11-13T11:20:00.000-08:00

We will we will rock you hljómar af vörum beggja barnanna minna þessa dagana. Ég snéri mér nú bara við og gapti þegar Freyja Sif byrjaði líka. Óðinn Bragi tróð upp á sumarhátíð í leikskólanum í vor og tók þar ásamt þremur öðrum sænskan eruovision smell. Annar hópur tróð upp með we will rock you. Þetta var mjög skemmtileg hátíð og hver smellurinn á fætur öðrum tekinn. Í vikunni fengu þau að horfa á upptöku af hátíðinni á leikskólanum. Hann kom sönglandi heim þann daginn we will rock you og hefur sönglað það mikið síðan. Svo byrjaði Freyja Sif í gær með laglínuna alveg á hreynu, ííiii ííiii okkjú. Já það er ókeypis skemmtun hér á hverjum degi. Ég náði held ég einhverju á videó. Þarf að ræða við tæknimanninn á heimilinu hvernig ég sit það á netið:)

Annars erum við hress. Hlökkum til helgarinnar. Ætlum að gera eitthvað ógeðslega skemmtilegt:) Segi ykkur kannski frá því eftir helgi;)

Bless í bili

Erla Rut og co.

Máli mál

2008-11-06T11:24:00.000-08:00

Jahh hvað haldiði. Kallinn er á næturvöktum þessa vikuna og við ákváðum að nota tímann á daginn á meðan að börnin eru í leikskólanum til að mála panelinn í loftonum í húsinu. Nú er panellinn í kjallaranum og á miðhæðinni orðinn hvítur og fínn og húsið hefur bara stækkað finnst mér um þónokkra fermetra. Þá er bara efsta hæðin eftir og stefnan tekin á hana eftir þrjár vikur, þá er næsta næturvaktavika:) Alltaf gaman að gera soldið fínt hjá sér:)

Annars er allt gott í fréttum héðan. Allt við það sama, bumban vex og frúin orðin heldur hreyfihömluð á köflum, stynur ægilega við að klæða sig í sokkana og bryður bakflæðtöflur á kvöldin til að geta sofið eitthvað fyrripart nætur. Þetta eru nú bara hressandi og skemmtilegir fylgikvillar þessara síðustu mánaða meðgöngunnar og um að gera að njóta þeirra á meðan ástandið varir;)

Börnin eru hress og ánægð með lífið. Veturinn skall hér á með látum á einni nóttu fyrir um það bil einni viku. Skítakuldi allan daginn og ekkert um annað að ræða en skíðadressið og ilja sér með te eða kakó þegar inn er komið. Við fluttum klukkuna á vetrartíma um þarsíðustu helgi og þar með skall myrkrið á klukkutíma fyrr á daginn. Seinnipartarnir eru sem sagt soldið dimmir og kaldir svo við erum voða dugleg að hugga okkur í kjallaranum með kertaljós og kósýheit. Það er nú einmitt sjarminn við þennan árstíma og við njótum þess eins og við getum:)

Óðinn Bragi er að fyllast af jólahug og getur ekki beðið eftir jólunum. Það er soldið erfitt að róa taugarnar og biðina þar sem tímahugtakið er ekki alveg orðið tært í kollinum á honum.

Hann spyr: "mamma hvað er langt þangað til jólin koma?"

M: það eru tveir mánuðir. Nokkrar vikur. Það er soldið langt þangað til.

ÓB: Já eru tíu dagar þangað til?? (það finnst honum mjög langur tími!!!)

M: nei það er miklu meira

ÓB: mamma ég get ekki beðið

Hluti af spenningnum er að þegar jólin eru búin þá kemur nýja barnið og hann er mikið að spá í það þessa dagana hvenar og hvernig þetta gerist allt saman. Gaman að því:)

Tölurnar eru líka soldið að vefjast fyrir honum og algengt að fá spurningar eins og:

ÓB: mamma er 29 miklu meira en 30????

M: Nei það er einum minna en 30.

ÓB: já!! en 25 er það miklu meira en 30????

M: Nei það er líka minna en 30.

Svo það eru miklar pælingar í gangi í kollinum á drengnum og vonandi fer eitthvað að skýrast þarna uppi:)

Skemmtilegt þetta líf:)

Kveð að sinni. Hafið það gott öll.

Knús og kram frá Gautaborgurum;)

xox xox xox

Vá hvað tíminn líður!!!

2008-10-30T03:28:00.000-07:00

Hann flýgur aldeilis frá manni tíminn. Bara einn og hálfur mánuður síðan ég bloggaði síðast og þrjár vikur síðan við komum aftur heim frá Íslandi, sem er nú líka heim en þar eigum við tvö heim svo við eigum alls þrjú heim. Ekki slæmt það. Vitum bara ekki alltaf hvaða heim við erum að tala um þegar við tölum um heim en ætli heimilið okkar hérna í bláa húsinu, eins og við köllum það, sé ekki mest heim núna.

Íslandsferðin var ljúf og góð þrátt fyrir hremmingar í efnahagsmálunum á klakanum. Yndislegt að hitta alla, þó við hefðum nú viljað komast yfir fleiri heimsóknir og hittinga. Ótrúlegt hvað tíminn er fljótur að fljúga frá manni og maður kemst ekki yfir helminginn af því sem maður ætlaði að gera. Þurfum að skipuleggja þetta betur næst, góðan hóphitting einhversstaðar á góðum stað;) En það var gott að anda að sér kalda loftinu á klakanum og skella sér á snjóþotu og svona.

Þegar við lentum í Köben kom Guðjón Bragi og sótti okkur, en þau Harpa geymdu bílinn fyrir okkur, og brunaði með okkur heim til þeirra og bauð uppá þessa líka dýryndis kreppusúpu eins og hann kallaði hana. Það var frábært að stoppa og teygja úr sér áður en við lögðum svo af stað í bíltúrinn til Gautaborgar. Þökkum kærlega hlýjar og góðar móttökur;)

Það var ágætt að eiga þriggja daga helgi framundan til að vinda ofan af tímamismuninum og óreglunni sem gerir iðulega vart við sig í svona fríum. Nú svo tók bara rútínan og hversdagurinn við. Eins og það er nú gott að brjóta upp annað slagið rútínuna þá er nú alltaf gott að fara í hana aftur. Ég byrjaði á sænskunámskeiði þegar við komum aftur heim. Var reyndar eitthvað vitlaust metin í námskeið og lenti á allt of léttu námskeiði. Strax á öðrum degi vildi kennarinn útskrifa mig og setja mig á annað námskeið sem byrjar í janúar. Þá verð ég nú orðin eitthvað annars hugar og ákvað að halda bara aðeins áfram á þessu námskeiði og láta hana leiðrétta mig og hafa soldið fyrir mér. Ég fékk samt frjálsa mætingu þar sem ég er eiginlega útskrifuð. Svo ég bara les og skrifa eitthvað bull hérna heima og fer svo af og til og læt hana fara yfir, mjög þægilegt.

Svo er hrekkjavaka um næstu helgi en það er siður sem hefur fest í sessi hér í landi og maður verður vel var við í búðunum núna. Ætli við reynum ekki að taka einhvern þátt í því. Keypti einhverja nammipoka í gær til að eiga handa betlandi krökkum. Finn svo einhverja búninga til á börnin og höfum gaman af þessu:)

Heyrðu já ég lofa bótum á myndaleysinu fljótlega, en þangað til næst,

hafið það gott og munið að hugga ykkur í kreppunni;)

knús og kossar

Erla Rut og co.

Það er gaman að þessu

2008-09-18T03:04:00.000-07:00

Þau halda manni við efnið blessuð börnin. Í gærkvöldi var sama rútína og venjulega í háttatímanum, lásum, sungum og kysstumst góða nótt. Óðinn Bragi sofnaði mjög fljótlega en eitthvað brölt var á Freyju Sif, hlátrasköll og gleði. Ég lét hana nú eiga sig þar sem hún var ekkert að kvarta og hætti svo að heyra í henni og hún lognaðist út af. Þegar ég fór sjálf að sofa kíkti ég á börnin. Óðinn Bragi lá með mikilli værð yfir sér og steinsvaf. Svo kíkti ég á Freyju Sif og fann hana þá allsnakta, steinsofandi í stórum pissupolli!!!! Gleðin hjá henni fyrr um kvöldið hefur snúist um það að klæða sig úr náttfötunum og bleyjunni, það fannst henni mjög fyndið. Hún lá svo oná náttfötunum sem voru rennandi pissublaut og meira og minna allt rúmið, töluvert af pissi slapp fram hjá pissulakinu en sængin slapp nú alveg. Það þurfti sem sé að skipta á rúminu og barninu. Hún skildi ekkert í þessu brölti en hélt svo bara áfram að sofa þegar var búið að græja allt saman.

Við fórum skellihlæjandi að sofa, því að þetta er náttúrulega bara fyndið barn og uppátækin ótrúleg.

Komum ekki á morgun heldur hinn

sjáumst þá;)

Erla Rut

Jebb jebb

2008-09-16T11:26:00.000-07:00

Óðinn Bragi var í dag að byrja í íþróttaskóla. Hann er einu sinni í viku klukkutími í senn. Hann er búinn að bíða eftir þessu svo lengi og var orðinn frekar spenntur þegar leið á daginn. Hann passaði sig sko vel á því að borða ekkert nema epli og annað sem kallast gæti íþróttanammi. Svo dressaði hann sig upp í Brasilíubúninginn og var til í slaginn. Svo var þvílíkt stuð, farið í leiki og þrautabraut o.fl. mikið hlaupið og svitnað. Gaman að þessu:) Nú reyndar missir hann af næstu þremur tímum þar sem við verðum á íslandi en hann hefur þá eitthvað að hlakka til þegar við komum aftur til baka:)

Annars er allt gott að frétta. Hægt og rólega verið að vinna úr things to do listanum áður en við förum og skipuleggja ferðalagið til Köben. Það eru fjórir dagar til stefnu og spennan magnast:) Freyja Sif náttúrulega skilur ekki neitt og gæti ekki verið meira sama, en Óðinn Bragi er farinn að skipuleggja hvað hann ætlar að gera þegar hann kemur á klakann. Ég sjálf ætla að byrja á klippingu strax á mánudagsmorguninn svo ég geti nú með góðu móti brosað framan í alla sem ég á eftir að hitta:)

Hlakka til að sjá ykkur

xox xox xox

Early pearly

Nýjustu tölur

2008-09-10T02:44:00.000-07:00

Freyja Sif var í mælingum í morgun en hún hefur verið í auknu eftirliti vegna þess hve smá hún er. Tölurnar í morgun komu hins vegar mjög vel út og mældist hún 10,9 kíló og 82,9 cm. Eða eigum við að segja 11 kíló og 83 cm og málið er dautt;) Hingað til hefur hún verið rúmum tveimur staðalfrávikum undir meðalkúrfu og þótti það of mikið, en hafði svo núna rokið upp í eitt og hálft staðalfrávik undir meðalkúrfu þannig að daman er svo sannarlega að taka við sér. Hún er sem sagt enn þá undir meðalkúrfunni sem er nú samt allt í lagi innan ákveðinna marka, enda ekki komin af neinum risum og hefði sennilega þurft að eiga einhverja aðra foreldra ef hún hefði átt að verða einhver risi:) Íslenski læknirinn okkar sem hefur verið með hana í þessu eftirliti er nú fluttur heim en það kom ekki að sök því nýji sænski læknirinn hennar eiginlega bara útskrifaði hana úr þessu eftirliti. Þegar heilsa barnanna manna er annars vegar er mjög gott að geta tjáð sig á sínu tungumáli og skilið öll samskipti við lækninn. Því erum við mjög glöð með tímasetningu mannsins á flutningnum heim og framfarir dömunnar.

Ísinn, pulsurnar og allt góðgætið í sumar hefur greinilega farið vel í drottninguna svo nú er bara að halda áfram og fara kannski að taka aðeins á borðsiðunum. Hingað til höfum við haft þau fyrirmæli frá lækni að hún eigi að borða hvað sem er hvenar sem er og höfum við reynt að fara eftir því, allt til að skvísan stækki. Það hefur þýtt söng og leiki við matarborðið, mat fyrir framan sjónvarpið, mat í baðinu, mat úti á róló og mat út um allt. Fara fram og til baka frá borðinu, því einbeiting dömunnar er ekki mikil og ekki mikil eirð í henni til að sitja lengi við matarborðið og næra sig. Ef athyglin er hins vegar á einhverju öðru og einhver nennir að moka upp í hana á meðan getur hún svo sem alveg borðað og þetta hefur verið látið eftir henni þar sem hún þurfti að borða og stækka. Nú eru spennandi tímar fram undan þar sem reynt verður að taka á þessum málum. Sjáum hvernig fer. Sú stutta er nú þekkt fyrir þrjósku og ákveðið skap og móðirin þó þolinmóð sé hefur ekki alltaf þolinmæði í litlu gribbu. Spennandi að sjá hver hefur betur;)

En allavega góðar fréttir og engin hormónameðferð fyrirhuguð sem er mikill léttir. Það hefði þýtt sprautu í puttann á hverju kvöldi frá þriggja ára aldri fram á gelgjuskeið 13-14 ár svo við erum mjög kát með þetta:)

Erum farin að telja niður í íslandsferðina, nú eru 10 dagar þangað til jiiibbííííí

Knús og kossar

Erla Rut och familj

Sunnudagur

2008-09-07T05:28:00.000-07:00

Já síðustu fréttir voru af aðlögun prinsessunnar í leikskólanum. Af því er það að frétta að þetta gengur bara mjög vel. Kveðjustundin er stundum örlítið tregafull en batnar með hverjum degi. Henni finnst mjög skemmtilegt að syngja og dansa og það gjarnan notað til að dreyfa huga hennar fyrst eftir að ég er farin. Þá eru græjurnar tjúnaðar með Línu Langsokk í og allir dansa og syngja og mín búin að gleyma sér:)

Óðinn Bragi er mjög hress líka. Hæstánægður með leikskólann og bíður nú spenntur eftir að byrja á íþróttanámskeiði sem byrjar á þriðjudag eftir rúma viku. Hins vegar spyr hann reglulega hvenar jólin koma og býður spenntur eftir þeim, en ástæðan fyrir því er held ég sú að ég sagði honum um daginn að barnið kæmi úr bumbunni eftir jól. Gæti orðið löng bið eftir jólunum og svo barninu en ýmislegt að gerast fram að því. Íslandsferðin er náttúrlega næst á dagskrá og bara tvær vikur í hana við erum orðin mjög spennt:)

Um síðustu helgi fengum við þau Hörpu Hrönn, Guðjón Braga og Úlf Stefán í heimsókn. Það var virkilega kósý og skemmtilegt. Pizzakvöld á föstudeginum og bæjarferð á laugardeginum svo var brunað heim og íslensku lambi skellt á grillið. Svo brunuðu þau til baka til Köben uppúr hádegi á sunnudeginum. Mjög góð helgi, takk fyrir komuna mínir kæru vinir.

Þessi helgi er búin að líða ósköp ljúft og hægt frá okkur. Palli var í vinnunni í gær og hellidemba fram eftir degi svo við hin tókum því bara verulega rólega hérna heima. Kíktum svo aðeins út á róló seinnipartinn þegar stytti upp. Palli átti að vera fram yfir kvöldmat á vaktinni en svo kom í ljós að hann þurfti að taka nóttina líka. Hann fékk að skreppa heim í tvo tíma um kvöldmatarleytið. Við hin héldum áfram að hafa það kósý á meðan hann fór aftur í vinnunna og kom svo ósofinn heim í morgun. Við ákváðum þá að drífa okkur eitthvað út svo hann gæti sofið og tókum okkur til í sund sem var svo lokað þar sem hreinsunarbúnaður var eitthvað bilaður. Þá brunuðum við bara í ræktina og mamman tók aðeins á því þar og börnin léku sér í barnagæslunni sem er alveg frábær og þau hæstánægð að komast í. Svo ákváðum við að leyfa pabbanum að sofa aðeins lengur og skelltum okkur á Burger King til að drepa tímann örlítið lengur. Það fór nú vel í liðið og allir hæst ánægðir með daginn. Nú er allt í rólegheitum. Freyja sefur, Óðinn Bragi að leika sér í legó og við að sötra kaffi!! Ljúfur og góður sunnudagur:)

Hafið það gott elskurnar

xox xox xox

Erla bumba

Skapstór lítil stelpa

2008-08-26T12:07:00.000-07:00

Freyja Sif er búin að vera í aðlögun síðan á mánudag í síðustu viku. Hérlendis er farið aðeins hægar í svona leikskólaaðlögun en heima. Hér eru alveg tvær vikur í aðlögun eða meira eða minna eftir þörfum barnsins. Freyja er á sinni seinni viku núna og hefur gengið mjög vel enda ég verið á staðnum og hún svona litið eftir mér öðru hverju hvort ég sé ekki örugglega þarna ennþá. Í dag skildi ég hana svo eftir í fyrsta skipti og ákvað hún þá að sýna þeim þessu kellingum þarna hvað í henni býr. Hún tapaði sér í reiði og henti sér í gólfið, það fékk sko enginn að halda á henni. Þær áttu ekki orð aumingja konurnar en gáfust ekki upp, sóttu vagninn hennar með bangsanum og duddu í og buðu henni þar oní sem hún þáði nú og róaði sig þar á öruggum stað. Þegar hún hins vegar var búin að jafna sig nokkrum mínútum síðar skreið hún sjálf úr vagninum og fór að leika sér og var bara hin hressasta.

Já maður verður nú einhvernvegin að láta í ljós óánægju sína þegar manni er misboðið. Nú verður spennandi að sjá hvernig viðbrögðin verða í fyrramálið.

En já við höfum það gott

hafið það gott líka

Erla Rut og allir hinir líka

Jæja jæja

2008-08-21T03:23:00.000-07:00

Já ég fór í bloggsumarfrí en er komin aftur fersk og endurnærð:) Vona að allir hafi haft það fínt í sumar. Við erum allavega búin að hafa það voða fínt. Fengum fullt af gestum og brölluðum ýmislegt skemmtilegt með þeim. Anna og Jónas komu í júní, svo komu Abba og Bogey, næst voru Logi, Bína, Bjartur og Sunna og síðust komu mamma og pabbi og svo Gummi bróðir með Nönnu og Sóleyju. Einhverjar myndir voru teknar en myndavélin er eitthvað orðin gömul og lúin eða allavega batteríin í henni svo ansi oft þegar átti að fara taka myndir stóðum við með batteríslausa myndavél. En einhverjar tókst okkur að taka og þær sjáið þið á myndasíðunni okkar.

Nú er hins vegar rútínan tekin aftur við. Palli farinn að vinna aftur Óðinn Bragi kominn í leikskólann sinn aftur og Freyja Sif byrjuð í aðlögun í leikskólanum líka. Ég er á biðlista eftir sænskunámskeiði og vonast til að komast inn í september eða október. Helst ekki fyrr en í október samt því við ætlum að skella okkur í heimsókn til Íslands í lok september og fram í október, svo það myndi henta einstaklega vel ef námskeiðið myndi ekki byrja fyrr en eftir íslandsferðina, en það kemur í ljós.

Já það eru víst fleiri fréttir af okkur sem eflaust einhverjir eiga eftir að heyra. Fjölskyldan er sem sagt að fara að stækka um einn heilann í janúar. Eins og myndirnar sína er nú þó nokkuð farið að sjást á frúnni enda þriðja skiptið sem belgurinn er teygður út með stuttu millibili. Sónarinn er búinn og enginn typpalingur sást þrátt fyrir sterka tilfinningu mína fyrir strák en ljósan vildi nú heldur ekki lofa stelpu því það voru víst mjög slæm skilirði til að greina þarna á milli svo við verðum víst bara að bíða og sjá. líkurnar eru enn 50 á móti 50;) En þar sem við eigum nú eitt af hvoru tagi erum við ekki að stressa okkur á þessu, þetta kemur bara í ljós. Okkur heilsast allavega vel og það er fyrir öllu.

En jæja þá eru helstu fréttir komnar til skila svo ég ætla að fara að snúa mér að ryksugunni, minni bestu vinkonu:)

Þangað til mjög fljótlega

hafið það rosa gott

knús og kossar

Erla Rut

2008-06-15T14:04:00.001-07:00

Gleymdi að segja ykkur að það eru loksins komnar maímyndir og það sem af er júní:)

Helgin liðin

2008-06-15T13:32:00.000-07:00

Þá er komið sunnudagskvöld og helgin á enda. Eftir að okkur tókst að klæða okkur í gærmorgun lá leiðin út í garð í smá garðvinnu. Það eru tvö beð hérna í sameiginlega garðinu sem voru í algjörri órækt. Við tókum að okkur að hreinsa til í þeim og fórum með margar hjólbörur af ónýtri mold og illgresi upp í skóg. Þau líta nú mun betur út núna en svo þarf bara að kaupa nýja mold og fylla uppí og svo á að sitja einhverja skemmtilega berjarunna sem krakkarnir geta týnt af og smakkað á. Gaman að því:) Svo hóuðum við í íslendingana í hverfinu og grilluðum íslenskt lambakjöt, sem var mjög gott að vanda. Haukur og Fanney komu með börnin og Jóhanna kom með Gizur, Gotti var fjarverandi. Stóru börnin léku úti til örugglega níu en komu þá inn og fengu að horfa á sjónvarp og léku legó svona í bland. Klukkan var orðin hálf eitt þegar partýið var búið og við Óðinn Bragi settumst í stigann að kveðja gestina og á augabragði var ÓB bara sofnaður í stiganum. Alveg búinn á því enda búinn að hamast allan daginn. Í dag eru hins vegar bara búin að vera rólegheit. Löbbuðum aðeins í skóginum í morgun og lögðum okkur í hádeginu:) Kíktum svo við hjá Hauk og Fanney og lentum í vöfflukaffi, ekki slæmt það. Nú sitjum við bara í rólegheitum og bíðum eftir Ömmu Maren. Hún er núna á leiðinni frá Köben með lest. Hún á að koma um tvö leytið í nótt til Gautaborgar og Palli ætlar að skutlast eftir henni svo hún lendi ekki í fulluköllunum á lestarstöðinni um miðja nótt!!!

Best að hætta þessu blaðri

kveð að sinni

ykkar Erla Rut

Loksins loksins

2008-06-13T23:09:00.000-07:00

Jæja þá kannski kominn tími á nýjan póst!!!

Eins og ég sagði í síðasta pósti áttum við von á ömmu Dóru. Hún er komin og farin. Hún fór síðasta sunnudag og var þá búin að vera í tvær vikur hjá okkur. Fyrri vikan hennar var nú ekki mjög spennandi. Við lágum öll í upp og niðurgangi nema amma og Freyja. Svo amma lenti bara í að þrífa upp og niðurganginn og hjúkra sjúkum. Held að sé nú alveg hægt að hugsa sér skemmtilegra frí!!! Seinni vikan var nú mikið betri. Hún byrjaði á vorhátíð leikskólans þar sem Óðinn Bragi tróð upp með gítarspili. Það var sem sagt svona eruovision þema. Hópnum var skipt upp í nokkur atriði og allir völdu sér sitt uppáhaldseurovisionlag og tróðu upp með því. Óðinn Bragi var í hóp með þremur öðrum strákum og völdu þeir sér eurolag svíja frá því í fyrra The Worrying Kind með The Ark. Þeir stóðu þrír mjög stífir fyrir aftan söngvarann, tveir með bassa og einn með gítar. Söngvarinn var minna feiminn, kom fram ber að ofan með svört axlabönd, skikkju og silfur hálsband. Svo hoppaði hann um sviðið í takt við lagið. Þeir voru æðislegir og hátíðin mjög skemmtileg. Svo fórum við með ömmu í Slottskogen að skoða selina og hin dýrin, settumst á kaffihús og fórum á róló. Svo fórum við líka með ömmu í dýragarðinn í Borås á þjóðhátíðardag Svíja. Haukur og Fanney og börn skelltu sér með okkur líka. Mjög skemmtilegt:) Svo var bara farið að líða að heimferð ömmu og við tókum því rólega heima.

Undanfarna viku erum við svo búin að eyða á rólóunum í hverfinu og er það alltaf jafn skemmtilegt. Í gær var pizzakvöld, en helgin er annars óráðin, kemur í ljós hvort gerist ekki eitthvað spennandi:) En á aðfaranótt mánudags kemur amma Maren til okkar og ætlar að vera í tvær vikur. Jónas afi kemur líka en ekki fyrr en í lok vikunnar þegar sjómaðurinn verður kominn í frítúr. Við hlökkum mikið til að fá þau.

En jæja nú er Bangsímon að verða búinn. Ég er að spá í að fara að klæða mig og börnin og gera eitthvað við þennan dag, hvað sem það verður!!! Örugglega eitthvað spennandi eða sjáum til;)

Knús til allra

Erla Rut

Föstudagskvöld

2008-05-23T11:43:00.000-07:00

Þeir eru í ansi föstum skorðum föstudagarnir hjá okkur. Byrjuðum daginn á að fara í ræktina, svo fórum við á foreldramorgun í kirkjunni og lékum við krakkana þar. Þegar það var búið fórum við heim í hádegismat og Freyja fór að leggja sig. Á meðan að Freyja lagði sig bökuðum við Óðinn Bragi köku, svo fórum við út á pall að sleikja sólina þangað til hún vaknaði. Þá fengum við okkur köku á pallinum og fórum svo á róló og lékum okkur þar þangað til að það var kominn tími til að fara heim að gera pizzu en það er alveg heilagur siður á föstudögum og þróunin orðin þannig að við erum að spá í að fara framleiða hahaha. Eftir pizzuna fórum við með ís í kjallarann og horfðum á Andrés Önd. Nú eru börnin hins vegar komin í rúmið og klukkan ekki orðin níu svo ég ætla að koma mér núna mjög vel fyrir í sófanum og athuga hvort ég finn ekki eitthvað skemmtilegt í imbanum. Mjög svo týpískur föstudagur og afar notalegur:)

Svo er náttúrulega eurovisionkvöld á morgun og gríðarleg stemning og við auðvitað getum kosið Ísland og látum ekki á okkur standa með það:) Á sunnudaginn ætlar svo Amma Dóra að koma til okkar og vera hjá okkur í rólegheitum í tvær vikur. Það verður voða notalegt og við hlökkum mikið til:)

Áður en ég sný mér að imbanum verð ég að segja ykkur frá kommenti vikunnar frá syni mínum. Við vorum að labba fram hjá leikskólanum hans einhvern seinnipartinn og hann sér að það er verið að sækja vinkonu sína.

Hann kallar á eftir mér: Annie er að fara heim sé ég

Ég: hvað segirðu?

ÓB: ég sé að Annie er að fara heim. Ég sé það með mínum trúandi augum!!

Ég: HA hvað segirðu?

ÓB: Ég sé það með mínum trúandi augum!!

Ég: jaahá.

Veit ekki hvort þetta er afbökun á máltækinu: ég trúi ekki mínum eigin augum, eða hvaðan þetta kemur. Veit ekki hvernig maður svarar svona, sneri mér bara undan og reyndi að bæla niður hláturinn:)

Jæja þá ætla ég að snúa mér að Desperate Housewives þarf að vinna upp heila þrjá þætti svo ég kveð að sinni.

Bestu kveðjur

Erla Rut

Enn ein helgin liðin.

2008-05-18T12:36:00.000-07:00

Rosalega líður tíminn hratt. Þetta var hins vegar hin ágætasta helgi. Á föstudagskvöldið var íslendingaparty. Í partýum hér fylgja börnin bara með því það hefur enginn barnapössun svo sumir koma og stoppa stutt og koma svo börnunum heim í rúm. Aðrir eins og við koma og stoppa nánast til miðnættis og horfa á börnin sín ganga í svefni í tvo tíma áður en haldið er heim:) Börnunum finnst þetta samt alveg hrikalega skemmtilegt og göslast áfram í leik og gleði. Það var orðið frekar fyndið að fylgjast með Freyju Sif ráfa um og finna sér eitthvað til dundurs. Hún var nánast farin að vagga þegar hún gekk um en reyndi að bera sig vel og þykjast vera ekki sybbin fyrir fimmaur. Óðinn Bragi bar sig líka vel en rotaðist um leið og hann lagði hausinn á koddann um miðnætti. Svo tókum við því bara rólega á laugardeginum. Bökuðum köku og höfðum það kósý. Grilluðum um kvöldið og fórum svo í kjallarann með ís og spólu í tækið, eða þannig!! Virkilega huggó:)

Í dag sunnudag fór Óðinn Bragi í afmæli til vinar síns í leikskólanum. Það var allri deildinni boðið svo þetta voru um tuttugu börn. Við Freyja fórum með inn og ætluðum að stoppa í smá stund en vorum frá upphafi til enda. Lenti ósjálfrátt í smá sjálfboðavinnu, var farin að reima skó og aðstoða við klósettferðir áður en ég vissi af. Sem var bara mjög gaman og veitti ekkert af auka höndum og augum til að fylgjast með öllu þessu liði. Það var farið út í ratleik og fleira grillaðar pylsur og borðaður ís. Svo endaði afmælið eins og öll sænsk afmæli og veislur á fiskileiknum. Þá veiða allir einn nammipoka og fara svo heim. Minn maður var mjög sáttur við daginn enda búið að bíða eftir þessu í næstum því mánuð.

Svo er bara ný vika fram undan. Spurning hvað hún hefur uppá að bjóða??

Meira seinna

Erla Perla

Gullmolar frá gullmola

2008-05-13T13:09:00.000-07:00

Þessa dagana fljúga gullmolarnir úr munni sonar míns. Þeir feðgar voru að spjalla um daginn og Palli segir: er þetta bubbi byggir og hrappur? Þá segir Óðinn Bragi: já þetta er hrappur FUGLASKRÆFA.

Við höfum haft það fyrir reglu í vetur að fara á foreldramorgna í kirkjunni á föstudögum. Á leiðinni inní kirkjuna löbbum við meðfram kirkjugarðinum. Í eitt skiptið á leiðinni meðfram kirkjugarðinum er hann mjög hugsi, horfir í kringum sig og segir svo: deyjarar eru góðir!! Ég endurtek DEYJARAR?!!! Hann: já þeir sem setja dána fólkið oní jörðina:)

Eitt enn. Hann fékk niðurgang um daginn og ég var að útskýra það fyrir honum að hann yrði að prumpa í klósettið en ekki í brókina því það gæti komið eitthvað með því. Svo situr hann á klósettinu og er að spjalla við pabba sinn og segir svo: mamma heldur að ég sé með NIÐURFALL í maganum!!!

Nokkrum dögum seinna þegar niðurgangurinn var nú yfirstaðinn hleypur hann á klósettið og kemur svo mjög hreykinn til baka: mamma ég fór að prumpa í klósettið var það ekki gott hjá mér??

Annars er allt við það sama. Örlítið kólnandi veður reyndar en mjög fínt engu að síður.

Ég þakka öll kommentin en spyr hvernig farið þið að þessu? ég get nebblega ekki kommentað sjálf á síðuna mína!! hahaha

skilst þetta sé eitthvað stillingaratriði sem ég þarf að redda.

Palli var að bæta apríl myndum á síðuna okkar svo endilega kíkiði;)

Bið annars að heilsa í bili

See you later aligater

Sé varla á skjáinn fyrir sólinni

2008-05-06T03:04:00.000-07:00

Já hér er bara sól og blíða upp á hvern einasta dag. Hitinn er kominn í 23 gráður og við bara á sandölum og ermalausum bol;) Við erum strax farin að hvíða aðlögun að íslensku veðurfari aftur en það eru víst einhver ár í það svo við njótum á meðan.

Palli var að byrja að vinna aftur í dag eftir rúmlega viku frí, svo við gátum aldeilis notið veðursins undanfarna daga og gerðum ýmislegt skemmtilegt saman. Fórum í Lieseberg sem var frekar vinsælt. Haukur og Fanney komu með okkur með börnin sín tvö Hildi og Bjarka. Hildur er 6 ára og Bjarki er tæplega tveggja eins og Freyja. Hildur og óðinn Bragi voru að tapa sér af spenningi og skemmtu sér konunglega. Hin tvö áttu að sofa í upphafi ferðar en Freyja Sif er nú ekki þekkt fyrir að missa af partyi eða annarri skemmtun og reif sig upp stuttu eftir að við komum inní garðinn og var hin hressasta. Var sem sagt sofnuð áður en við fórum inn og svaf í svona 20 mínútur því hún ætlaði greinilega ekki að missa af þessu. Hún fór í eina mjög saklausa hringekju og það var eins og hún væri í rússíbana, brjálað stuð. Óðinn Bragi fór í klessubíla, rússíbana, báta, kastala og fullt af tækjum og var alsæll ætlar sko að fara aftur mjög fljótlega.

Á sunnudaginn fórum við upp að vatni sem er hér bara 10 mín göngufæri frá húsinu. Við tókum með okkur pylsur og bolta og grilluðum og lékum okkur. Haukur og Fanney komu líka með og það var mikið fjör. Við vatnið er lítil strönd og gaman að busla í vatninu á sumrin. Í þetta skiptið létum við þó kvartbuxurnar nægja og skildum sundfötin eftir heima. En svíjarnir eru greinilega meiri hetjur en við allavega voru þó nokrir útí vatninu að leika sér. Þeir eru nú frekar klikkaðir eða kannski er ég bara aumingi!!

Þeir sem hafa heimsótt okkur vita að við erum eiginlega ekki með garð, bara tvo palla sitthvoru meigin við húsið. Þrátt fyrir það erum við búin að planta nokkrum arðbærum plöntum hérna í kringum okkur. Í eldhúspallinn var sagað gat fyrir hallonberjarunnum og einu eplatré. Við endann á húsinu var plantað rifsberjarunnum og svo er pottur á pallahandriðinu með jarðarberjum. Svo er bara að bíða eftir uppskerunni og bjóða í eplapæ og berjadeserta;) Ef einhver er að hugsa um að koma í heimsókn má eiga von á uppskerunni síðsumars. Annars er víst nóg til af þessu í búðinni ef haustið hentar ykkur ekki:)

Já svo var bara mikið um rólóferðir og kvöldmaturinn borðaður á sænskum tíma milli 4 og 5 í sólinni. Bíðum eftir næsta fríi hjá fyrirvinnunni. En það verður víst einhver að vinna fyrir hveitinu í kökurnar;)

Jæja ég er alveg að stikkna er að spá í að fara inn í léttari buxur og hengja svo upp úr þvottavélinni úti.

Bið að heilsa í bili

knús og kossar úr Gautaborg

Erla á tækniöld:)

2008-04-29T12:35:00.000-07:00

Ja hérna hér. Undur og stórmerki gerast enn og Erla fór að blogga!!! Ég ákvað að reyna að færa mig örlítið nær tækniöld og prófa þetta blogg sem allir eru að tala um;) en fyrir ykkur sem þekkið mig eru tölvur, almenn tækni og ég ekkert eitthvað sem maður setur samasem merki á milli, en við skulum sjá hvað gerist hvort þetta verður eina færslan eða hvort þær verða fleiri!!!

Ég held að það viti það nú allir að ég bý með fjölskyldunni í Svíþjóð núna. Hér er ég búin að vera heimavinnandi húsmóðir í eitt ár!! Það er bara búið að vera fínt. Nóg að gera að koma okkur fyrir í húsinu og aðlagast hinu og þessu í nýja landinu. Óðinn Bragi byrjaði á leikskóla síðasta haust og var smá stund að aðlagast en finnst rosa gaman núna og á orðið fullt af vinum þar. Einn sem er svona besti vinur og þeir fengu að hittast á sunnudaginn síðasta heima hjá vininum að leika saman og það var þvílíkt sport. Var í þrjá tíma og kom alsæll heim á eftir. Freyja Sif er búin að fá leikskólapláss í haust en hún hefur hingað til bara verið heima hjá mömmu. Við Freyja höfum nú brallað ýmislegt, mikið verið í því að halda einhverjum mat að dömunni þar sem hún þykir ekki stækka nóg eða þyngjast. Þar af leiðandi fáum við okkur samkvæmt læknisráði einn góðann súkkulaðimola eftir hádegismatinn í góðri trú um að kúrfan komi betur út í næstu skoðun, allavega fyrir Freyju, kúrfa móðurinnar er sem betur fer ekki mæld. En sem mótvægi á móti súkkulaðimolanum í hádeginu þá höfum við gert það að rútínu að fara í ræktina á morgnana. Börnin fara í barnapössun og mamman fer og púlar. Eftir ræktina fer svo Óðinn Bragi þrisvar í viku í leikskólann. Hann er sem sagt þriðjudag, miðvikudag og fimmtudag í leikskólanum og svo fær hann fjögra daga helgarfrí, því mömmur sem eru heima með yngri börn fá ekki meira en 15 tíma fyrir eldri börnin í leikskólanum, og þrátt fyrir að vera orðinn mjög ánægður í leikskólanum er hann samt alltaf jafn feginn helgarfríinu þessi elska. Svo förum við á föstudögum á mömmumorgna í kirkjunni sem þeim finnst mjög gaman, þar er sungið borðað og leikið. Svo er Pizzakvöld um kvöldið. Vikurútínan svona nokkuð í föstum skorðum.

En nú er vorið heldur betur komið með rúmlega 20 stiga hita og sól. Það eru sko allir mjög glaðir með það og líf og fjör á róló alltaf núna. Svo það er bara gaman að vera til. Palli er í fríi þessa viku og við héldum upp á það í dag og spókuðum okkur í bænum og keyptum okkur ís.

Svo við segjum bara gleðilegt sumar allir:)

Nú er ég búin að stikkla á stóru um venjur okkar hér í Gautaborg en það er frá ansi mörgu að segja eftir heilt ár en þið fáið bara að heyra af því smátt og smátt.

Vonandi verð ég svo dugleg að blogga og þið að lesa;)

Bið að heilsa í bili

knús og kram yfir hafið og um allan heim

Erla Rut mega bloggari;)